БИДНИЙ ТУХАЙ

ТЭРГҮҮНИЙ МЭНДЧИЛГЭЭ

Монгол улсын газар тариалангийн үйлдвэрлэлийг тогтвортой байлгахын тулд агрономчдын ур чадварыг хөгжүүлэх, тэдний эрх ашгийг хамгаалах, нийгэмд сурталчлах зорилготой бид ажиллаж байна.

Ирээдүй хойч үеийнхэндээ эх орныхоо үржил шимт газраа өвлүүлэн үлдээж, хүн амаа эрүүл хүнсээр, мал аж ахуйг тэжээлээр хангаж улмаар нийгмийн тогтвортой хөгжлийг бий болгохоор мэргэжлийн түвшинд үйл ажиллагаа явуулдаг газар тариалангийн салбар нь Монгол улсын хөгжлийн гарц гэдэгт итгэдэг бөгөөд бид агрономч мэргэжлээрээ бахархдаг.

Монголын агрономчид, ахлах, тэргүүлэх, зөвлөхүүдийг мэргэжлийн салбарын манлайлагчид болгох, үндэсний болон олон улсад хүлээн зөвшөөрөхүйц түвшинд давтан сургах замаар нийгэмд агрономч мэргэжилтнүүдийн оролцоог нэмэгдүүлж, газар тариалангийн үйлдвэрлэлийн бүтээмжийг нэмэгдүүлэн ажиллана.

Газар тариалангийн салбарын бүхий л хууль тогтоох, хэрэгжүүлэх байгууллагууд, сургалт, эрдэм шинжилгээний байгууллагууд, төрийн бус байгууллагуудтай хамтран ажиллаж агрономчдын үнэ цэнийг сайжруулах тал дээр илүү анхаарах болно.

Агрономчдын дуу хоолойг нийгэмд хүргэх мэргэжлийн, төгсөгчдийн холбоо нь байж, орчин үеийн дэвшилтэт технологи, техникийг салбарын үйл ажиллагаанд нэвтрүүлэн, захиалгат судалгаа, сургалтуудыг зохион байгуулж, газар тариалангийн үйлдвэрлэлийг мэргэшүүлэхэд анхааран ажиллаж байна.

Дэлхийн хүн амын өсөлт, хоол хүнс хомсдох, уур амьсгалын өөрчлөлт зэрэг биднээс үл хамаарсан сорилтуудад дасан зохицох шаардлага тулгарсаар байгаа энэ үед манай холбооны хувьд агрономчдын ур чадварыг тасралтгүй хөгжүүлэх, газар тариалангийн үйлдвэрлэлийн технологийн чадварлаг удирдагч болоход нь туслахад бид чиглэж ажилласаар ирлээ. Цаашид олон улсын мэргэжлийн холбоодтой хамтран ажиллах болно.

"Монголын Агрономчдын Холбоо” ТББ-ын гишүүд, дэмжигчид та бүхний ажил үйлс улам хөгжин, чанартай, арвин ургацын эзэд байхыг хүсэн ерөөе.